O X Ribadeo Indiano, que se celebrará do 11 ao 13 de xullo de 2025, renderá homenaxe ao filántropo Ramón González. O Concello de Ribadeo e a asociación ACISA presentaron hoxe o cartel desta nova edición do evento.
O alcalde, Dani Vega, declarou:
“Os días 11, 12 e 13 de xullo celebraremos o Ribadeo Indiano. Son dez anos de historia, de posta en valor dunha cultura arquitectónica, social, unha reivindicación do que somos. Queremos dedicar esta edición á filantropía, e a un dos indianos máis coñecidos e recoñecidos de Ribadeo: Ramón González”.
Vega relatou que “naceu en Ribadeo, estudou Náutica e Comercio e emigrou a Arxentina, onde traballou como empregado e logo fundou a súa propia empresa, logrando unha gran fortuna. Tras case 30 anos regresou a Ribadeo e desenvolveu un destacado labor filantrópica. Foi membro e presidente da Sociedade de Socorros Mutuos e Instrución A Concordia, apoiou ao Ateneo de Ribadeo, financiou clases e instrumentos, colaborou coas festas patronais, achegou fondos para o Teatro e doou unha gran cantidade de diñeiro para a construción do mercado municipal. En 1922 foi nomeado fillo predilecto de Ribadeo e homenaxeado pola comunidade”.
“En 2025, queremos dedicar o Ribadeo Indiano a este filántropo. A filantropía continúa viva e moitas persoas seguen colaborando para que esta celebración histórica siga crecendo”, engadiu o alcalde.
Tamén anunciou que o domingo 13 de xullo Ribadeo recibirá a unha das mellores orquestras latinoamericanas: Van Van, que ofrecerán un gran concerto como parte do evento.
Agradeceu a ACISA polo seu labor organizativo, á Xunta de Galicia por ser o principal patrocinador, á Deputación de Lugo pola súa colaboración a través de ACISA, e a todas as persoas que fan posible que o Ribadeo Indiano siga mellorando cada ano.
Carmen Cruzado, presidenta de ACISA, sinalou:
“Durante dez anos, o Ribadeo Indiano estivo dedicado a diferentes temáticas e países. Pareceunos moi oportuno dedicar esta décima edición a Ramón González, ao cumprirse 100 anos do seu falecemento. Ademais do seu labor en Ribadeo, promoveu a apertura de sucursais do Banco Español del Río da Prata en Vigo e Santiago, e deixou pegada no Porriño, terra natal da súa esposa, onde financiou o templo parroquial, o estadio e o concello”.
Cruzado agregou:
“Xa estamos na conta atrás para este décimo aniversario. Queremos que as rúas se enchan de historia, de branco, e de persoas dispostas a render homenaxe a quen emigrou en busca dun futuro mellor, como fixo Ramón González. Algúns triunfaron, outros non tanto, pero todos achegaron á súa terra e axudaron a facer de Ribadeo unha vila importante”.
A organización (Concello e ACISA) está a finalizar o programa de actividades para esta edición, que se presentará nas próximas semanas. ACISA agradeceu á Vicepresidencia da Deputación de Lugo e á Xunta de Galicia polo seu apoio, e ao Concello polo traballo conxunto que fai do Ribadeo Indiano unha cita imprescindible do verán na provincia e unha das máis importantes de Galicia.
Na presentación participaron o alcalde Dani Vega, as concelleiras de Cultura e Turismo Begoña Sanjurjo e Marta Saiz, a presidenta de ACISA Carmen Cruzado, o xerente Jesús Pérez e Trinidad Otero, directiva da asociación.