Onde comer

A gastronomía é unha parte esencial da identidade de Ribadeo. Os sabores do mar e da terra combínanse con produtos locais de gran calidade e con receitas que reflicten a tradición e o apego á contorna. Comer en Ribadeo é tamén unha forma de coñecer a súa historia, a súa cultura e o seu modo de vida.

O municipio conta con máis de medio centenar de establecementos que apostan por unha cociña baseada no produto, con especialidades como o polbo, as navallas, as luras da ría, o mero ou a robaliza. A estes, súmanse verduras e hortalizas da horta local, que completan unha proposta gastronómica consolidada. Bares, tascas, restaurantes e locais de cociña contemporánea conviven nunha contorna onde tapeo e tradición van da man.

Quen desexe levar un pedazo de Ribadeo atoparán tamén unha coidada oferta de produtos locais: viños galegos con D.O., licores tradicionais, queixos, embutidos, conservas e repostería artesá. Destacan elaboracións como os doces conventuais das Clarisas, os Chocolates Moreno ou a Torta de As Catedrais. Moitos destes produtos poden adquirirse en comercios do centro, na Praza de Abastos ou no Mercado dos Domingos, activo durante os meses de verán.