Ribadeo Indiano

Unha ceremonia para revivir a pegada indiana

En 2025, Ribadeo celebrará a décima edición da súa Festa Indiana, un evento que transforma a vila durante varios días para recrear a sociedade de principios do século XX. Vestimentas, música, bailes, rutas e xogos evocan a influencia que os indianos —galegos que regresaron de América— deixaron na cultura e na vida local.

Durante a festa, veciños e visitantes vístense con traxes de época e participan nunha programación pensada para todos os públicos. Non faltan os mercados, concertos, visitas guiadas e, entre as actividades máis esperadas, a divertida Xincana Indiana.

A Xincana Indiana: probas, pistas e moito enxeño polas rúas de Ribadeo

Unha das actividades máis esperadas da Festa Indiana é “A pegada indiana”, unha orixinal xincana para maiores de 18 anos. En equipos, os participantes percorren diferentes puntos estratéxicos do centro histórico superando probas que recrean a viaxe de ida… coa vista posta en América.

A mecánica é sinxela: cada reto superado dá acceso á seguinte pista e suma puntos para optar a un dos tres premios que se entregan ao finalizar a xornada. É necesario inscribirse previamente e seguir as bases do xogo, que podes consultar na seguinte ligazón:

O pasado que inspira a Festa Indiana

A historia dos indianos é o fío condutor desta celebración. As súas viaxes, a súa arquitectura e a súa forma de vida transformaron Ribadeo e son hoxe a alma desta festa. A través destas dúas claves poderás coñecer mellor o que se conmemora e revive cada verán.

Historia y arquitectura

Moda indiana

Historia e arquitectura

A comezos do século XX, o regreso dos emigrantes transformou a imaxe e o ritmo de Ribadeo. A vila creceu co impulso económico e social de quen volvía desde América, deixando pegada en obras públicas, educación, vida cultural… e tamén na arquitectura.

As casas indianas, coa súa mestura de estilos europeos e coloniais, xardíns con palmeiras e materiais modernos, convertéronse en símbolo de éxito e progreso. Ribadeo conserva hoxe unha das maiores concentracións deste tipo de vivendas en Galicia, visibles en rutas urbanas e rurais que permiten coñecer este legado.

Moda indiana

Os indianos non só trouxeron diñeiro e ideas: tamén importaron unha forma de vestir que falaba de elegancia, modernidade e estilo. Os homes lucían guayaberas, traxes de liño, chapeus panamá, bastóns ou reloxos de peto. As mulleres levaban vestidos amplos, pamelas con flores, antucas con encaixe, abanicos e colares longos.

Os tecidos eran lixeiros e refinados —liño, algodón, sedas naturais—, en tons claros con detalles de cor. Unha moda herdada da Habana ou Buenos Aires que hoxe se revive cada ano durante a Festa Indiana.